जळगाव जिल्हा सहकारी दूध उत्पादक संघातर्फे शेतकऱ्यांसाठी उभारण्यात आलेल्या अत्याधुनिक प्रशिक्षण केंद्रासह विविध विकासात्मक उपक्रमांचे उद्घाटन उत्साहात पार पडले. दुध संघात साकारलेल्या या प्रकल्पामुळे दूध उत्पादक शेतकऱ्यांना आधुनिक दुग्ध व्यवसायाचे प्रशिक्षण आणि मार्गदर्शन मिळणार आहे.
यावेळी जळगाव जिल्हा दूध संघाचे संस्थापक चेअरमन तथा माजी गृह राज्यमंत्री स्व. जे. टी. महाजन यांच्या स्मारकाचे लोकार्पण पालकमंत्री गुलाबराव पाटील यांच्या हस्ते करण्यात आले. त्यामुळे कार्यक्रमाला विशेष महत्त्व प्राप्त झाले.
प्रशिक्षण केंद्राच्या माध्यमातून दुग्ध व्यवसायातील आधुनिक तंत्रज्ञान, दूध संकलन प्रक्रिया आणि शेतकऱ्यांच्या क्षमता वाढीसाठी आवश्यक प्रशिक्षण दिले जाणार आहे. दूध संघाच्या आधुनिकीकरणाला आणि शेतकऱ्यांना सक्षम करण्याच्या दृष्टीने हा प्रकल्प महत्त्वपूर्ण ठरणार आहे.
